ចង់មានក្លិនក្រអូបពេញមួយថ្ងៃហ្អ? មិនប្រាកដត្រូវបាញ់ទឹកអប់១ម៉ោងម្តងទេ

វាអាចមិនចម្លែកនោះទេ ដែលមនុស្សគ្រប់គ្នាចូលចិត្តនៅក្បែរមនុស្សដែលមានក្លិនក្រអូប។ ប៉ុន្តែសម្រាប់អ្នកដែលចង់ឲ្យអ្នកជុំវិញខ្លួនឈ្លក់វង្វេងដោយសារក្លិនក្រអូបពីរាងកាយរបស់យើង មិនប្រាកដថារវល់តែត្រូវបាញ់ទឹកអប់១ម៉ោងម្តងដើម្បីក្រអូបនោះទេ លោកអ្នកគួរអនុវត្តទង្វើទាំងអស់នេះវិញទើបប្រសើរ។

១. ងូតទឹកសម្អាតខ្លួនឲ្យសព្វរាងកាយ

ជាពិសេសខាងក្រោយត្រចៀក កខាងក្រោយ និងតំបន់ដែលងាយបែកញើស។ ប្រើសាប៊ូដុសខ្លួនក្លិនក្រអូបបែបដែលលោកអ្នកចូលចិត្ត។

២. កក់សក់ឲ្យបានជាប្រចាំ

វិធីនេះជួយឲ្យអ្នកមានទំនុកចិត្តលើខ្លួនឯងថែមមួយកំរិតទៀត ត្រូវចងចាំថាក្រអូបតែខ្លួនមិនទាន់គ្រប់គ្រាន់ទេ។ ការមានសសៃសក់រលោង និង ក្រអូបដោយក្លិនសាប៊ូក៏ជាមន្តស្នេហ៍ម្យ៉ាងដែរ។

៣. ប្រើប្រាស់សាប៊ួបោកខោអាវដែលមានក្លិនក្រអូប

រើសយក សាប៊ួបោកខោអាវដែលមានក្លិនក្រអូបដែលអាចតោងជាប់សម្លៀកបំពាក់បានយូរ។

៤. ផ្លាស់ប្តូរខោអាវក្នុងឲ្យបានញឹកញាប់

ទាំងនេះបូករូមទាំងស្លៀកនូវឈុតក្នុងដែលមានអនាម័យ និង បោកសម្អាតបានត្រឹមត្រូវ។

៥. ចៀសវាងស្លៀកសម្លៀកបំពាក់ដដែលពីរទៅបីដង

ក្លិនញើស ឬក្លិនសារខ្លួនរបស់លោកអ្នកអាចនឹងមិនគួរឲ្យប្រាថ្នាឡើយសម្រាប់ខ្លួនអ្នកផ្ទាល់ និង អ្នកជុំវិញខ្លួន។

៦. ពាក់ស្បែកជើងដែលមិនមានក្លិនស្អុយ និង មិនងាយបង្ករឲ្យហប់បែកញើស

ក្លិនជើងរបស់មនុស្សខុសប្លែកគ្នា អ្នកខ្លាំងមានក្លិនខ្លាំង ដូច្នេះហើយគួរតែកុំពាក់ស្បែកជើងឃ្លុបដែលនាំឲ្យហប់ជើង កាន់តែស្អុយថែមទៀត។

៧. ដុសសម្អាតធ្មេញមួយថ្ងៃពីរដង

ជាទូទៅគឺត្រូវដុះពេលព្រឹកក្រោកពីគេង និង ពេលយប់មុនចូលគេង។ ធ្វើបែបនេះគឺជួយឲ្យខ្យល់ដង្ហើមលោកអ្នកស្រស់ស្រាយ និង ក្រអូប។ លោកអ្នកក៏មិនគួរភ្លេចយកច្រាស់ដុះធ្មេញដុះលើអណ្តាតរបស់អ្នកដើម្បីបង្កើននូវអនាម័យមាត់ធ្មេញ។

៨. ខ្ពុលមាត់លោកអ្នកបន្ទាប់ពីញុំាអាហាររួច

ការជ្រើសរើសប្រភេទទឹកខ្ពុលមាត់ លោកអ្នកគួរជ្រើសរើសប្រភេទដែលមិនមានជាតិអាល់កុល ព្រោះអាល់កុលជួយមិនឲ្យមានក្លិនមាត់ត្រឹមរយៈពេលខ្លីប៉ុណ្ណោះ បន្ទាប់មកនឹងធ្វើឲ្យក្លិនមាត់កាន់តែអាក្រក់ជាងមុន។