ជីវប្រវត្តិសង្ខេបរបស់ប្រធានាធិបតីហ្វីលីពីន លោក Rodrigo Duterte

លោក​Rodrigo Duterte ដែល​ជា​ប្រធា​នា​ធិប​តី​សព្វ​ថ្ងៃ​នៃ​ប្រទេស​ ហ្វីលីពីន​បាន​កើត​នៅ​ថ្ងៃ​ ទី​ ២៨​ខែ​មិនា​ឆ្នាំ​ ១៩៤៥​ ក្នុង​តំបន់​ Maasin​ ប្រទេស​ហ្វីលីពីន​។ ស្ថិត​ក្នុង​ចំណោម​បង​ប្អូន​ ៥នាក់​ លោក​ Rodrigo Duterteជា​កូន​ទី​២​ដែល​មាន​ឪពុក​ឈ្មោះ​ Vcente G. Duterte ដែល​មាន​មុខ​របរ​ជា​មេធាវី​ និង​ម្ដាយ​ឈ្មោះ ​Soledadដែល​មាន​មុខងារ​ជា​គ្រូ​បង្រៀន​។

Photo crdit: Forbes

ប្រវត្តិសិក្សារបស់លោក Rodrigo Duterte

លោក Rodrigo Duterteបានចាប់ផ្ដើមការសិក្សាដំបូងក្នុងសាលាបឋមសិក្សា Laboon ក្នុងតំបន់ Maasin។ ប៉ុន្តែលោកបានសិក្សានៅទីនោះបានត្រឹមតែរយៈពេល ១ឆ្នាំប៉ុណ្ណោះ ដោយគ្រួសាររបស់លោកត្រូវប្តូរទីលំនៅទៅរស់នៅក្នុងទីក្រុងDavao។ បន្ទាប់មកលោក Rodrigo Duterteក៏បានចូលរៀននៅក្នុងសាលាបឋមសិក្សា Santa Ana ហើយបានបញ្ចប់ការសិក្សាពីទីនោះក្នុងឆ្នាំ ១៩៥៦។

ឈានចូលដល់ថ្នាក់វិទ្យាល័យ​ ជិវិតការសិក្សារបស់លោកមិនបានដើរទៅដោយរលូននោះទេ ដោយសារតែគាត់ត្រូវបានគេបណ្ដេញចេញពីសាលាចំនួន ២ដងដោយសារតែអត្តចរិកមិនចេះគោរពវិន័យរបស់លោក។ ក្រោយមកលោកបានចូលរៀនបន្តនិងបញ្ចប់ការសិក្សានៅវិទ្យាល័យ Departmentក្នុងតំបន់ Digosនិងបញ្ចប់ការសិក្សានៅទីនោះ។ ការបណ្ដេញលោក Rodrigo Duterteចេញពីសាលានេះមិនមែនដោយសារតែគាត់ជាសិស្សមិនល្អនោះទេ ប៉ុន្តែដោយសារតែគាត់ចូលចិត្តដើរលេងជាមួយក្រុមក្មេងពាលដែលមានចរិកហិង្សា ហើយវាបានធ្វើឲ្យលោក Rodrigo Duterteមានសមត្ថភាពខាងដោះស្រាយបញ្ហាពិបាកៗជាច្រើនក្នុងទីក្រុង។

បន្ទាប់ពីបញ្ចប់ការសិក្សាថ្នាក់វិទ្យាល័យ លោក Rodrigo Duterteបានបន្តការសិក្សាថ្នាក់មហាវិទ្យាល័យនិងទទួលបានសញ្ញាប័ត្រផ្នែក វិទ្យាសាស្រ្តនយោបាយក្នុងឆ្នាំ ១៩៦៨។ បន្ទាប់មកទៀតលោក Rodrigo Duterteបានចូលរៀនបន្តក្នុងមហាវិទ្យាល័យច្បាប់និងបញ្ចប់ការសិក្សាក្នុងឆ្នាំ ១៩៧២។

អាជីពរបស់លោក Rodrigo Duterte

លោក Rodrigo Duterteបានចាប់ផ្ដើមអាជីពរបស់លោកក្នុងទីក្រុង Davaoផ្ទាល់តែម្ដង។​ ឆ្នាំ ១៩៧៧លោកបានក្លាយទៅជាមេធាវីពិសេសនៅការិយាល័យអយ្យការទីក្រុងនិងបានបម្រើការងាររហូតដល់ឆ្នាំ​ ១៩៧៩។​ ចាប់ពីឆ្នាំ ១៩៧៩​រហូតដល់ឆ្នាំ ១៩៨១លោកបានក្លាយខ្លួនជាជំនួយការទី៤នៃព្រះរាជអាជ្ញាទីក្រុង។ ក្រោយមកទៀតនៅឆ្នាំ ១៩៨១ ដល់ឆ្នាំ ១៩៨៣លោកបានក្លាយជាជំនួយការទី៣ ហើយនៅឆ្នាំ ១៩៨៣ដល់ឆ្នាំ ១៩៨៦លោកបានក្លាយជាជំនួយការទី៤នៃព្រះរាជអាជ្ញា។ ក្នុងឆ្នាំ ១៩៨៦ដដែលនេះ បន្ទាប់ពីរដ្ឋាភិបាលផ្ដាច់ការនៃ Ferdinand Marcos បានបញ្ចប់លោកRodrigo Duterteត្រូវបានគេជ្រើសរើសឲ្យធ្វើជា អភិបាលរងមន្រ្តីទទួលបន្ទុកសម្រាប់ទីក្រុង Davao។ ឆ្នាំ ១៩៨៨លោក Rodrigo Duterte​បានចូលរួមប្រកួតក្នុងការជ្រើសរើសចៅហ្វាយក្រុង​ Davao ហើយគាត់ក៏បានឈ្នះក្នុងការបោះឆ្នោតជ្រើសរើសនោះ។ លើសពីនេះលោកបានឈ្នះក្នុងដំណែងជាចៅហ្វាយក្រុងនេះ ចំនួន២អណត្តិក្រោយទៀតជាប់ៗគ្នារហូតឆ្នាំ ១៩៩៨។

ក្រោយមកទៀតក្នុងការបោះឆ្នោតជ្រើសរើសចៅហ្វាយក្រុងឆ្នាំ ១៩៩៨ លោកRodrigo Duterte​មិនបានចូលរួមនោះទេដោយសារតែច្បាប់ប្រទេសហ្វីលីពីនបានកំណត់មិនឲ្យឈរឈ្មោះជាប់គ្នាច្រើនជាង ៣អណត្តិឡើយ។​ បន្ទាប់មកទៀតក្នុងឆ្នាំ ១៩៩៨ រហូតដល់ឆ្នាំ ២០០១លោកបានក្លាយទៅជា សមាជិកសភាក្នុងស្រុកទី១នៃទីក្រុង ​ Davao។

ឈានចូលដល់ឆ្នាំ ២០០១ លោកបានចូលរួមឈរឈ្មោះជាចៅហ្វាយក្រុងម្ដងទៀត ហើយលោកបានឈ្នះចំនួន ៣អាណត្តិជាប់ៗគ្នាទៀតរហូតដល់ឆ្នាំ ២០១០ហើយគាត់បានសម្រេចសមិទ្ធផលសំខាន់ៗជាច្រើនក្នុងគ្រប់គ្រងរបស់គាត់ដោយក្នុងនោះមានដូចជា ការកម្ចាត់គ្រឿងញៀន ការបង្កើតច្បាប់ប្រឆាំងការជក់បារី ការហាមឃាត់ការលក់​ ការបម្រើ ការប្រើប្រាស់គ្រឿងស្រវឹងចាប់ពីម៉ោង ១:០០ព្រឹករហូតដល់ម៉ោង ៨:០០ព្រឹក។ បន្ថែមពីនេះលោក Rodrigo Duterteក៏បានបង្កើតសេចក្ដីព្រាងច្បាប់សិទ្ធិស្រ្តីដែលមានគោលបំណងលុបបំបាត់ការរើសអើងចំពោះស្រ្តី និងលើកស្ទួយសិទ្ធិរបស់ពួគគេផងដែរ។

បន្ទាប់ពីមានមុខងារជាចៅហ្វាយក្រុងចំនួន៣អណត្តិជាប់គ្នានោះ លោកមិនអាចឈរឈ្មោះបានទៀតទេក្នុងការបោះឆ្នោតឆ្នាំ ២០១០។ ប៉ុន្តែលោកបានក្លាយទៅជាអនុប្រធានខណៈអ្នកស្រី Sara Duterte-Carpioដែលជាកូនស្រីបង្កើតរបស់លោកជា​ចៅ​ហ្វាយ​ក្រុង​។​ ដល់ឆ្នាំ ២០១៣លោក Rodrigo Duterte​បាន​ជាប់​ជា​ចៅ​ហ្វាយ​ក្រុង​ម្ដង​ទៀត​ដោយ​គាត់​បន្ត​ធ្វើការដើម្បីឲ្យទីក្រុងរបស់គាត់មិនមានបទល្មើសនានាកើតឡើង។ ចុង​ក្រោយ​លោក​ Rodrigo Duterteបានក្លាយជាប្រធានាធិបតីនៃប្រទេសហ្វីលីពីនទាំងមូល បន្ទាប់​ពី​ឈ្នះ​ក្នុងការបោះឆ្នោតដែលធ្វើឡើងកាលពីថ្ងៃទី៩ខែឧសភាឆ្នាំ ២០១៦កន្លងទៅ។

អត្ថបទដោយ៖ ប៉ោ គីមហុក

ប្រភពអត្ថបទ៖​​​​​ THEFAMOUSPEOPLE